Ərdoğan ümid edir ki, taxıl müqaviləsi uzadılacaq
Türkiyə prezidenti Rəcəb Tayyib Ərdoğan taxıl müqaviləsinin müddəti mayın 18-dən başa çatandan sonra yenidən bu razəlaşmanın uzadılmasına ümid etdiyini bildirib.
TELEJURNAL xəbər verir ki, o, bu barədə bazar günü “TRT Türk” telekanalının efirində bildirib.
“Biz Ukrayna prezidenti Vladimir Zelenski və Rusiya liderləri və Vladimir Putinlə münasibətlərdə yaradılmış əlverişli atmosferdən həm əsirlərin mübadiləsində, həm də taxıl dəhlizinin təşkilində istifadə etdik. Biz bu istiqamətdə işimizi davam etdiririk, müqavilənin uzadılmasını səbirsizliklə gözləyirik”, – deyə Türkiyə lideri bildirib.
Taxıl müqaviləsinin uzadılması məsələsi ötən həftə Türkiyə və Rusiya prezidentləri arasında telefon danışıqları zamanı müzakirə olunub. Rusiya liderinin mətbuat katibi Dmitri Peskov cümə günü deyib ki, İstanbul razılaşmaları Rusiya Federasiyasına aid şərtlər baxımından yerinə yetirilmir və bu baxımdan müqavilənin uzadılması perspektivləri “o qədər də yaxşı deyil”.
“Hürriyet” qəzetinin məlumatına görə, Türkiyə tərəfi bu problemi yaxın günlərdə BMT, ABŞ və Böyük Britaniya nümayəndələri ilə müzakirə edəcək.
22 iyul 2022-ci il tarixində İstanbulda qida və gübrələrin beynəlxalq bazara tədarükü ilə bağlı sənədlər paketi imzalanıb.
İlkin olaraq müqavilələr 120 gün müddətinə bağlanıb, ötən ilin noyabrında həmin müddətə uzadılıb.
Bu il martın 18-də Rusiya sazişin müddətini 60 gün uzadacağını elan edərək, bunun BMT ilə imzalanmış memorandumun icrasını qiymətləndirmək üçün kifayət qədər vaxt olacağı barədə xəbərdarlıq edib.
Rusiya Xarici İşlər Nazirliyindən verilən məlumatda bildirilir ki, sövdələşmənin uzadılması ilə bağlı növbəti qərar “Rosselxozbank”ın “SWIFT” sisteminə yenidən qoşulmasından, kənd təsərrüfatı texnikasının tədarükü, ehtiyat hissələri, servis xidmətlərinin bərpasından, sığorta və təkrar sığorta üzrə məhdudiyyətlərin aradan qaldırılmasından, limanlara giriş qadağasının ləğv edilməsindən asılı olacaq. Həmçinin Tolyatti-Odessa ammonyak boru kəmərinin fəaliyyətinin bərpası, qida, gübrə istehsalı, eləcə də daşınması ilə məşğul olan Rusiya şirkətlərinin xarici aktivlərinin, hesablarının blokdan çıxarılması müqavilnin yenidən uzadılmasına təsir edə bilər.