Ən başda sevgi göstərməklə bərabər onlara xüsusi qayğıyla yanaşsaz uzun sürən bir dost qazanmış olacaqsınız-Aysun Şirinzadə

  Əksər insanların heyvanlara xüsusi sevgisi olur. Amma kənardan sevmək başqa, evdə saxlamaq başqa. Məsələ məhz evdə saxlamaqla bağlı olanda iki dəfə düşünmək lazımdır. Çünki nə qədər sevgi ilə yanaşma olsa da, ev heyvanı qulluq və qayğı tələb edir.

   Mövzu ilə bağlı heyvansevər  Aysun Şirinzadədən açıqlama aldıq.

Heyvansevər xanım qeyd edir ki, artıq 1 ildi ki British cinsində  “Zuzu” adlı pişiyi var.

  Aysun bildirir ki, heyvanları peyvənd etmədən qətiyyən çölə buraxmaq, gəzdirmək olmaz.  Əgər pişik və ya it peyvənd olunmayıbsa, çöldə gəzdirmək olmaz. Sırf iki peyvənd olunandan sonra (yaş həddindən asılı olaraq) çöldə gəzdirmək olar. Ən əsas səhvlər orada olur. Heyvan ona görə xəstələnir ki, peyvəndi vaxtında vurulmayıb. Gəzəndə xəstəliklərə yoluxurlar. Xəstəliklər isə müxtəlifdir.

   Peyvəndin qrafiki heyvanın yaşından, sağlamlıq durumundan asılıdır.  Artıq ilk müayinədə baytar ümumi peyvənd və qurd dərmanı üçün qrafiki, eləcə də bit və birələrə qarşı mübarizə tədbirlərinin nə zaman aparılacağını müəyyən edir.

 Aysun xanım bildirir ki, o sevimli ev heyvanı baytara peyvənd olunması üçün aparır. Bir peyvənd vurulduqdan 21 gün sonra ikinci peyvənd vurulur. Bu günlər ərzində heyvan çölə çıxmamalıdır. Niyə məhz 21 gün? Çünki məhz bu müddətdə peyvənd bədəndə immun cavab yaradır. İkinci peyvənddən sonra 90-95% immunitet yaranır. Peyvənd yüz faizlik müdafiə yaratmır. Bunu peyvənd istehsalçıları da deyir, təcrübə də göstərir. Peyvəndin effektivliyi heyvanın immun statusundan asılıdır. Heyvan nə qədər güclüdürsə, peyvənd də o qədər yaxşı işləyəcək.