Əli Məsimli: “Həddindən çox mərkəzləşdirmə bumeranq effekti verəcək”
Azərbaycanda son illər formalaşan yeni komandada hər şeyi həddindən çox mərkəzləşdirmək kimi təhlükəli bir tendensiya var, bu da bumeranq effekti verəcək.
Telejurnal xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında deputat Əli Məsimli bildirib.
“Son vaxtlar “Banklar haqqında”, “Mərkəzi Bank haqqında”, “Hesablaşmalar haqqında”, “Dövlət satınalmaları haqqında” qanunlarda müsbət məqamlarla yanaşı bir xüsusi xətt keçir. Bu da təmərküzləşdirmədir. Bunun hansısa normalar çərçivəsində dünya təcrübəsində öz əksini tapan dərəcəsini müsbət qiymətləndirirəm, amma o normadan yuxarı olması bizim inkişafımıza mənfi təsir göstərəcək. Məsələn, kimsə hansısa təşkilata rəhbər gələndə orada əvvəlcə bütün funksiyaları öz üzərinə götürür, sonra görür ki, bunun yarısını müavinə vermək lazımdır. Funksiyaları paylaşdırandan sonra həmin təşkilatda iş getməyə başlayır”, – deyə o qeyd edib.
Bundan başqa, deputat deyib ki, Azərbaycanda dövlət satınalmaları üzrə bir neçə stereotip formalaşıb: “Dövlət satınalmaları haqqında” yeni qanunda əlavə işlək mexanizmlər olmalıdır ki, bu stereoptipləri aradan qaldıraq. Məsələn, məmur sahibkarlığı satınalmalarda böyük oynayır. Bəzən məmurlar öz çətiri altında olan və yaxud kiminsə idarə etdiyi şirkətin xeyrinə satınalmalara təsir göstərir. Və yaxud vəzifəli şəxs birbaşa zəng vurub tenderin nəticəsini ləğv elətdirir və özünə yaxın adamın şirkətinin və yaxud öz şirkətinin tenderdə qalib gəlməsini təmin edir. Yeni qanun onların ifşasına gətirib çıxarmasa satınalama sahəsi bizdə işləməyəcək. Bundan başqa, hansısa idarəyə kiminsə vəzifəyə gətirilməsinə razılaşırlar, sonra deyirlər ki, filan vəzifə barədə müsabiqə elan edilir”.
