Elektron qaimə-fakturanın təsdiqlənməsi hansı müddətdə mümkündür?
Təqdim olunan elektron qaimə-fakturanın təsdiqlənməsi prosesi ilə bağlı müəyyən vaxt məhdudiyyəti tətbiq edilir.
‘TELEJURNAL’ Dövlət Vergi Xidmətinə istinadla xəbər verir ki, mövzunu şərh edən iqtisadçı ekspert Anar Bayramovun sözlərinə görə, vergiödəyicisi göndərilən elektron qaimə-fakturanı qəbul etdikdən sonra onu təsdiq etmək səlahiyyətinə malikdir.
Ekspert qeyd edib ki, əgər elektron qaimə-fakturanı qəbul edən vergiödəyicisi 5 gün ərzində onu təsdiq etməzsə, həmin elektron qaimə-faktura proqram təminatı tərəfindən avtomatik təsdiqlənir: “Məsələn, vergiödəyicisi 2021-ci il mayın 1-də malların satışı ilə bağlı qarşı tərəfə elektron qaimə-faktura göndərib. Əgər qarşı tərəf 5 gün ərzində elektron qaimə-fakturanı təsdiq etməzsə, 2021-ci il mayın 5-də həmin elektron qaimə-faktura təsdiqlənmiş hesab olunacaq”.
A.Bayramov, həmçinin bildirib ki, Nazirlər Kabinetinin qərarında 5 gündən sonra avtomatik təsdiqolunma məsələsi nəzərdə tutulmayıb. Bu müddət vergi orqanının AVİS proqramına verilən texniki tapşırığında müəyyən edilir.
https://azertag.az/xeber/Elektron_qaime_fakturanin_tesdiqlenmesi_hansi_muddetde_mumkundur-1932010
