“Elektromobillik üzrə Milli Plan”ın hazırlanması müzakirə edilib
Energetika Nazirliyində “Elektromobillik üzrə Milli Plan”ın hazırlanması müzakirə edilib.
“Telejurnal” bu barədə nazirliyə istinadən xəbər verir.
Məlumata görə, bu məqsədlə qurumda ABŞ-ın “Boston Consulting Group” (BCG) şirkətinin icraçı direktoru Arturs Smilkstinsin rəhbərlik etdiyi nümayəndə heyəti ilə görüş keçirilib. Görüşdə “2022-2026-cı illərdə sosial-iqtisadi inkişaf Strategiyası”na uyğun olaraq “Elektromobillik üzrə Milli Plan”ın hazırlanması çərçivəsində “Boston Consulting Group”la əməkdaşlıq məsələləri müzakirə edilib.
Bu sahədə inkişaf tendensiyaları, beynəlxalq təcrübə nəzərdən keçirilib. Elektromobillik planının hazırlanması üzrə şirkətin ilkin yanaşması, baxışları diqqətə çatdırılıb. Elektrikli nəqliyyat vasitələrinin geniş yayılması üçün enerji doldurma infrastrukturunun yaradılması, bu prosesin enerjiyə tələbata təsiri, azad edilmiş ərazilər və Naxçıvanın “yaşıl enerji zonası” konsepsiyasında inkişafı üçün elektromobilliyin tətbiqi, həmçinin ölkəmizdə elektromobillik planının hazırlanması üçün Texniki Tapşırıq sənədi ətrafında fikir mübadiləsi aparılıb, müvafiq tövsiyələr verilib.
