Əlcəzair portalı Prezident İlham Əliyevin AZƏRTAC-a müsahibəsinin əsas məqamlarını yayıb
“TELEJURNAL” xəbər verir ki, Əlcəzairin “Əl Hərir” portalında Azərbaycan Prezidenti İlham Əliyevin Gəncə şəhərinə səfəri zamanı AZƏRTAC-a müsahibəsinin əsas məqamları yayımlanıb.
Ərəbdilli oxucuların diqqətinə çatdırılıb ki, Prezident İlham Əliyev müsahibəsində İkinci Qarabağ müharibəsi dövründə Gəncənin cinayətkar Ermənistan ordusu tərəfindən dəfələrlə bombalandığını, şəhərə 13 raket atıldığını, onlardan 8-nin partlayaraq insanların həyatına son qoyduğunu deyib. Bu namərd atəş nəticəsində Gəncə şəhərində 26 mülki vətəndaşın erməni faşizminin qurbanı olduğunu xatırladan Azərbaycan dövlətinin başçısıbildirib: “Gəncə şəhəri həm “Toçka-U”, həm “SCUD” raketləri ilə atəşə tutulurdu. Biz bu məsələ ilə bağlı öz sözümüzü deyəndə Ermənistan tərəfi bunu inkar edirdi. Sonra da yalançı Ermənistan təbliğatı növbəti uydurma ortaya qoyaraq bəyan etmişdi ki, Azərbaycan özü öz şəhərlərini atəşə tutur. Görün nə dərəcədə alçaqlıq və vicdansızlıqdır”.
Xəbərdə qeyd olunub ki, Prezident İlham Əliyev ballistik raketlərin trayektoriyasının böyük dövlətlər tərəfindən izlənildiyini bildirib və hər kəsin erməni ordusunun gecə vaxtı dinc şəhəri, müharibə zonasından uzaqlarda yerləşən şəhərin məhz yaşayış məhəlləsini məqsədyönlü şəkildə atəşə tutduğunu gördüyünü söyləyib. Prezident İlham Əliyev əlavə edib: “Yəni, bu, təsadüfən açılan atəş deyildi, məqsədyönlü şəkildə yaşayış binasını vurmaq, Azərbaycan vətəndaşlarını öldürmək, Azərbaycan xalqının gözünü qorxutmaq, Azərbaycan rəhbərliyini torpaqların azad edilməsindən çəkindirmək məqsədi daşıyırdı. Əlbəttə, bu, hərbi cinayətdir və hərbi cinayət kimi dünya tərəfindən tanınmalıdır”.