ECOWAS hərbi komitəsi Nigerlə bağlı təcili iclas keçirəcək

02 Avqust 2023

Qərbi Afrika Ölkələri İqtisadi Birliyinin (ECOWAS) Ali Hərbi Komitəsi avqustun 2-dən 4-dək Nigerdəki vəziyyətlə bağlı təcili iclas keçirəcək.

TELEJURNAL xarici KİV-ə istinadən xəbər verir, bu barədə təşkilatın yaydığı hesabatda deyilir.

Görüş Nigeriyanın paytaxtı Abucada keçiriləcək.

İyulun 30-da keçirilən fövqəladə sammitdə ECOWAS liderləri Nigerdə hakimiyyəti ələ keçirmiş üsyançılardan dərhal prezident Məhəmməd Bazumu vəzifəsinə qaytarmağı və ölkədə konstitusiya quruluşunun bərpasını tələb ediblər. ECOWAS dövlətləri Niger ordusuna bu tələbləri yerinə yetirmək üçün bir həftə vaxt verib. Təşkilat üsyançılara qarşı konstitusiya nizamının bərpası üçün lazım olan bütün tədbirləri görəcəyi ilə hədələyib və güc tətbiqini istisna etməyib.

Xatırladaq ki, iyulun 26-da Niger Prezidenti Məhəmməd Bazum və həyat yoldaşı öz mühafizəçiləri tərəfindən saxlanılıb. İyulun 27-nə keçən gecə ölkənin silahlı qüvvələri ölkədəki bütün dövlət qurumlarının işini dayandırıb, komendant saatı tətbiq edib və sərhədləri bağlayıb.

Sizin reklamınız burada ola bilər.