Dil sadəcə ünsiyyət vasitəsi deyil, eyni zamanda ədəbiyyatdır, millətin taleyidir- Təranə Şükürlu
Bugün, avqustun 1-i Azərbaycan əlifbası və Azərbaycan dili günü kimi qeyd edilir.
Dilimizin ədəbi normalarının qorunması, bu yolda atılan məqsədyönlü addımlar haqqında Telejurnal.az-a açıqlamasında Filologiya üzrə fəlsəfə doktoru,dosent, Azərbaycan Milli Elmlər Akademiyasının Nəsimi adına Dilçilik İnsitutunun aparıcı Elmi işçisi Təranə Şükürlu bildirib.
Ulu Öndər Heydər Əliyevin 2001-ci il 9 Avqustda imzaladığı Azərbaycan əlifbası və Azərbaycan dili gününün təsis edilməsi haqqında fərmanı Ana dilimizin qorunması və inkişafı baxımından xüsusi əhəmiyyət kəsb edir. Bu fərmanla, avqustun 1-dən ölkəmizdə Azərbaycan əlifbası və Azərbaycan dili günü elan edilib. Bununla da , iki əlifbadan istifadəyə birdəfəlik son qoyuldu. Latın qrafikalı Azərbaycan əlifbasına keçidin ölkəmizdə 2001-ci ilin avqustunda bütövlükdə təmin edilməsi və yeni əlifbadan istifadə Müstəqil Azərbaycan Respublikasının ictimai, siyasi həyatında , yazı mədəniyyətimizin tarixində mühum hadisə oldu.
Dil sadəcə ünsiyyət vasitəsi deyil, eyni zamanda ədəbiyyatdır, millətin taleyidir.Hər bir şəxs dünya mədəniyyətinə bələdçiliyini dil vasitəsiylə əldə edir. Dil insanları bir-birinə bağlayır.Dilimizin nüfuzunu artırmaq üçün düzgün danışmağı və yazmağı bacarmalıyıq. Dilçilik insitutunda dilimizin saflığının qorunması, ədəbi dilin normalarının pozulması faktlarının qarşısının alınması sahəsində məqsədyönlü addımlar atılır. Son illərdə, dilçilik insitutunda Azərbaycan dilinin yeni sözlər və mənalar lüğəti, Azərbaycan dilinin orfoqrafiya lüğəti nəşr olunub, Azərbaycan dilinin orfoepiya normaları hazırlanıb. Həmçinin, Qarabağ dieloktoloji atlası çap olunub. Eyni zamanda Qərbi Azərbaycan toponimləri öyrənilir. Oktyabrda da bu mövzuda Respublika konfransı keçirilməyi planlaşdırılır.
Redaktor : Mehin Vəliyeva
Müxbir : Nigar Əkbərova