Cəbrayıl rayonunda baş vermiş mina hadisəsindən sonra müayinədən keçirilən ANAMA əməkdaşları evə buraxılıblar
Bakı, 20 iyun, AZƏRTAC-a istinadən xəbər verirki,
İyunun 17-də Cəbrayıl rayonunun ərazisində baş vermiş mina hadisəsi zamanı yaxınlıqda olan Azərbaycan Respublikasının Minatəmizləmə Agentliyinin (ANAMA) bir neçə əməkdaşı beynəlxalq minatəmizləmə standardlarına uyğun olaraq profilaktika məqsədilə həkim müayinəsindən keçirilib və onlara psixoloji dəstək göstərilib.
ANAMA-nın mətbuat xidmətindən daxil olan məlumatda bildirilib ki, Mərkəzi Klinik Gəncə Xəstəxanasına yerləşdirilən Quliyev Ələsgər Asif oğlu və Cəbrayıllı Fərid Zakir oğlu, eləcə də Bakı şəhər Mərkəzi Klinik Xəstəxanasına yerləşdirilən Mustafayev Mahir Hüsaməddin oğlu və Gözəlov Samir Arif oğlu bütün zəruri tibbi müayinələrdən keçirilərək evə buraxılıblar. Həkim nəzarətindən keçən hər bir əməkdaşın vəziyyəti qənaətbəxşdir.
İşğaldan azad edilmiş ərazilərdə təhlükəsiz mühitin yaradılmasında iştirak edən əməkdaşların sağlamlıq vəziyyəti hər zaman ANAMA-nın diqqət mərkəzindədir.