Canni De Byazi: “Bilirik ki, bütün komandalar reytinqdə bizdən üstündü, ancaq…”

“Çətin dövr yaşayırıq. Azərbaycan üçün qeyri-adi vəziyyətdi. Buna baxmayaraq, maksimum dərəcədə konsentrasiyalı olmağa çalışırıq. Sabahkı oyun bizim üçün vacibdi. Qrup birincisi olmaq istəyiriksə, yaxşı nəticə qazanmalıyıq. Bilirik ki, bütün komandalar reytinqdə bizdən üstündü. Ancaq məqsədimizi reallaşdırmaq üçün sona qədər mübarizə aparacağıq”.

“telejurnal” “Qaynarinfo”ya istinadən xəbər verir ki, bu fikirləri Azərbaycan millisinin baş məşqçisi Canni De Byazi UEFA Millətlər Liqasının qrup mərhələsinin III turunda Monteneqro ilə oyundan öncə mətbuat konfransında deyib.

İtalyan mütəxəssis “Monteneqronun əvvəlki rəqiblərdən nə kimi fərqi var” sualına belə cavab verib: “Monteneqro böyük keyfiyyətlərə malik komandadı. Bir çox oyunçusu dünyanın müxtəlif çempionatlarında çıxış edir. Həm təcrübəli, həm də gənc futbolçuları var. Onları yaxşı təhlil etmişik. İlk iki oyunda qələbə qazansalar da, böyük üstünlük əldə etdiklərini demək olmaz. Biz bir matçda uduzmuşuq. Hansı ki, həmin görüşdə bir saatdan çox azlıqda çıxış etmişik. Sabah kim az səhvə yol versə, qələbə qazanacaq”.

Baş məşqçi sabahlı oyunun heyətinini bu günkü məşqdən sonra müəyyənləşdirəcəyini bildirib.