Baş Prokurorluğun nümayəndələri beynəlxalq tədbirdə iştirak ediblər
Şanxay Əməkdaşlıq Təşkilatına üzv dövlətlərin prokurorluq orqanları nümayəndələrinin iştirakı ilə “Yealink” onlayn platforması vasitəsi ilə videokonfrans keçirilib.
TELEJURNAL xəbər verir ki, Baş Prokurorluğun mətbuat xidmətindən AZƏRTAC-a bildirilib ki, videokonfrans Rusiya Federasiyası Baş Prokurorluğunin təşkilatçılığı ilə reallaşıb. Prokurorların peşə hazırlığı və ixtisaslarının artırılması üzrə Şanxay Əməkdaşlıq Təşkilatına (ŞƏT) üzv dövlətlərin nümayəndələrinin iştirakı ilə keçirilmiş videokonfransa Rusiya Federasiyası Prokurorluğu Universitetinin prorektoru, fəxri işçi Tofiq Aşurbəyov sədrik edib.
Tədbirin əsas məqsədi prokurorların peşə hazırlığının həyata keçirilməsi ilə bağlı tədris müəssisələrinin qarşılıqlı əlaqələrinin genişləndirilməsi, o cümlədən insan alverinə qarşı mübarizə sahəsində müsbət təcrübənin müzakirəsi olub.
Sözügedən tədbirdə Baş Prokurorluğu Elm-Tədris Mərkəzinin prokurorları Nigar Əskərova və Rauf Abdullayev təmsil ediblər.
Videokonfrans zamanı təmsilçimiz tərəfindən Azərbaycan Respublikasında insan alveri ilə mübarizə sahəsində mövcud olan qanunvericilik və bu sahədə prokurorluqda keçirilən təlim tədbirləri barəsində dinləyicilərə ətraflı məlumat verilib.
Tədbirdə, həmçinin Türkiyə, Çin, Qazaxıstan, Belarus, Qırğızıstan, Tacikistan, Özbəkistan və Monqolustan nümayəndələri də iştirak ediblər.