Azərbaycanda qeyri-neft ixracı üzrə artımın 17,8 faizi “SOCAR Polymer”in payına düşüb
Fəaliyyətə başladığı gündən Azərbaycanın qeyri-neft sektorunun inkişafına mühüm töhfələr verən müəssisələrdən biri də “SOCAR Polymer” şirkətidir.
“TELEJURNAL” AZƏRTAC-a istinadən xəbər verir ki, ölkə üzrə qeyri-neft ixracının 9,1 faizi, qeyri-neft ixracı üzrə artımın 17,8 faizi “SOCAR Polymer”in payına düşüb. Polimer məhsullarının ixracı 2020-ci ilin yanvar-noyabr aylarında 88,8 milyon dollar təşkil etmişdirsə, ötən ilin eyni dövründə bu rəqəm 217,4 milyon dollar olub. Bu da 2,4 dəfə artım deməkdir. Şirkətin məhsulları əsasən Rusiya, Türkiyə, Qazaxıstan, Çin və Ukraynaya ixrac edilib.
Qeyd edək ki, “SOCAR Polymer” şirkəti 2013-cü il iyulun 16-da ölkənin kimya sənayesinin inkişafının sürətləndirilməsi məqsədilə təsis edilib. Şirkətin istehsalat obyektləri polipropilen (PP) və yüksək sıxlıqlı polietilen (YSPE) istehsal edən iki zavoddan ibarətdir. Həmin zavodlar Sumqayıt Kimya Sənaye Parkının ərazisində yerləşir. 184 min və 120 min ton illik istehsal gücünə malik olan PP və YSPE zavodları müvafiq olaraq 2018-ci ilin iyulunda və 2019-cu ilin fevralında istismara verilib.
