Azərbaycan MDB PA-nın Büdcə-nəzarət komissiyasının iclasında təmsil olunub
Fevralın 24-də Müstəqil Dövlətlər Birliyinin iştirakçısı olan dövlətlərin Parlament Assambleyası (MDB PA) Büdcə-nəzarət komissiyasının videokonfrans formatında iclası keçirilib.
“TELEJURNAL” AZƏRTAC-a istinadən xəbər verir ki, Parlamentin Mətbuat və ictimaiyyətlə əlaqələr şöbəsindən bildirilib ki, iclasda quruma daxil olan ölkələrin parlament üzvləri, MDB PA Şurası Katibliyinin vəzifəli şəxsləri iştirak ediblər.
Ölkəmizi bu tədbirdə MDB PA-da Azərbaycan nümayəndə heyətinin üzvü, deputat İqbal Məmmədov təmsil edib.
Komissiyanın iclasında assambleyanın fəaliyyətinin maliyyələşdirilməsi, büdcənin formalaşdırılması və icrası ilə bağlı məruzələr dinlənilib, məsələlər müzakirə olunub. Həmçinin MDB PA-nın Büdcə-nəzarət komissiyasının 2021-ci ildəki fəaliyyətinin yekunları nəzərdən keçirilib, qərarlar qəbul edilib.
İclasın yekununda komissiyanın növbəti iclasının tarixi və ilkin gündəliyi müəyyənləşdirilib.