Azərbaycan komandasının bayraqdarı: “Avropa Oyunlarında qızıl medal qazana bilərəm”
“Hədəfim ilk “3-lüy”ə düşməkdir. Əminəm ki, qızıl medal da qazana bilərəm”.
Bunu “Telejurnal” ın Polşaya ezam olunmuş əməkdaşına açıqlamasında III Avropa Oyunlarında kamandan oxatma yarışlarında qadınlar arasında fərdi mübarizədə ilkin təsnifat mərhələsini 645 xalla 23-cü pillədə başa vuran Azərbaycan idmançısı Yaylagül Ramazanova deyib.
O, ikinci atışlar zamanı daha yaxşı nəticə gözlədiyini gizlətməyib: “Amma hava şəraiti və digər amillər mənə mane oldu. Rəqiblərimi tanıyıram. Ümid edirəm ki, bu xallar onlara qalib gəlməyə kömək edəcək. Elə də pis nəticə deyil. Öz rekordumu yenilədim. Çox rahat işləyirdim, həyəcan yox idi”.
Ramazanova bildirib ki, Avropa Oyunlarının qalibi Paris olimpiadasına lisenziya qazanacaq.
O, Azərbaycan komandasının bayraqdarı seçilməsinə də toxunub: “Azərbaycan bayrağını dalğalandırdığım üçün fəxr etdim. Bunu ikinci dəfə etmək istəyirəm”.
