Azərbaycan Biznes İctimaiyyəti birgə bəyanat yayıb
Azərbaycan Biznes İctimaiyyəti birgə bəyanat yayıb.
Azərbaycanda Amerika Ticarət Palatası, Azərbaycanda Britaniya Biznes Qrupu (BBG), Azərbaycan-Fransa Ticarət və Sənaye Palatası, İtaliya-Azərbaycan Ticarət Palatası və İsrail-Azərbaycan Ticarət və Sənaye Palatası Azərbaycan xalqına birgə dəstəklərini ifadə ediblər.
“Biz, münaqişə zonası xaricindəki mülki şəxsləri və kritik infrastrukturu hədəf alan son və davam edən hücumlar da daxil olmaqla, Ermənistan tərəfindən Azərbaycana qarşı edilən bütün hərbi əməliyyatları pisləyirik. Həmçinin, hərbi əməliyyatlar nəticəsində həyatlarını itirmiş şəxslərin ailələrinə başsağlığı verir və hamıya əmin-amanlıq arzu edirik.
Birmənalı şəkildə Azərbaycanın ərazi bütövlüyünü dəstəkləyir, münaqişənin beynəlxalq hüquq normaları çərçivəsində və BMT Təhlükəsizlik Şurasının erməni qüvvələrinin Azərbaycanın bütün işğal olunmuş ərazilərindən dərhal, tam və qeyd-şərtsiz çıxarılmasını tələb edən 822, 853, 874 və 884 saylı qətnamələrinə uyğun olaraq həll edilməsinə çağırırıq.
Ötən günlər ərzində son 30 ildə ilk dəfə olaraq işğal altında olan bir neçə ərazinin erməni işğalından azad edilməsi, bir milyondan çox azərbaycanlı qaçqın və məcburi köçkünün öz evlərinə qayıdacağına və davamlı sülhün bərqərar olduğu stabil bölgədə yaşayacağına ümid verir”, – deyə bəyanatda qeyd olunub.
