Avstriyalı tələbələr üçün Azərbaycan muğamları və tar mövzusunda ustad dərsi təşkil olunub
Əməkdar artist, tanınmış tarzən Sahib Paşazadə incəsənət sahəsində dünyanın məşhur ali təhsil ocaqları sırasında yer alan Vyana Musiqi və Təsviri İncəsənət Universitetində ustad dərsi keçib.
“Telejurnal” AZƏRTACA istinadən xəbər verir ki, “Salam.Orient” festivalı ilə əməkdaşlıq çərçivəsində baş tutan dərsdə universitetin Xalq musiqisi tədqiqatları və etnomusiqişünaslıq ixtisası üzrə baş mütəxəssisi, professor Marko Kölbl Azərbaycan muğamı haqqında ümumi məlumat verib.
S. Paşazadə tələbələrə Azərbaycan muğamlarının quruluşu və digər ölkələrin muğamlarından fərqləndirici xüsusiyyətləri barədə danışıb, tar musiqi alətini təqdim edərək, onun tarixi inkişaf və təkamül yolu, Azərbaycan klassik muğam musiqisində yerindən, UNESCO tərəfindən Qeyri-Maddi Mədəni İrs Siyahısına salınmasından bəhs edib.
Tarzən, həmçinin dinləyicilərə Azərbaycan tarının digər ölkələrdə fərqli formalarda istifadə olunan bənzər musiqi alətləri ilə fərqləndirici xüsusiyyətləri və onun bütün mizrab ştrixləri barədə nəzəri məlumatları diqqətə çatdırıb.
Sonra S. Paşazadə tarın ifasında Azərbaycanın yeddi əsas muğamından qısa parçalar ifa edib, xarakterik xüsusiyyətlərə toxunub, eləcə də tar üçün bəstələnmiş klassik musiqi əsərləri barədə danışıb. Qeyd edilib ki, dahi Azərbaycan bəstəkarı Üzeyir Hacıbəyli beş əsas muğam pərdəsini saxlamaqla tar milli musiqi alətini Avropa klassik musiqi alətləri ilə bir cərgəyə çıxarıb.
Ustad dərsinin sonunda S. Paşazadə tələbələrlə birlikdə “Mahur” muğamından parça ifa edib. Xüsusi maraqla qarşılanan ustad dərsinin gələcəkdə tədris planı çərçivəsində təqdim olunması arzusu ifadə edilib.