Avstriyada turist gecələmələri pandemiyadan əvvəlki vəziyyətə çatıb.
Avstriyada turizm göstəricilərində müsbət irəliləyişlər qeydə alınıb və cari yay mövsümündə turist gecələmələrinin sayı pandemiyadan əvvəlki səviyyəyə çatıb.
TELEJURNAL.az AZƏRTAC-a istinadən xəbər verir ki, Avstriya Statistika İdarəsinin hesabatına əsasən, may-iyun aylarında ölkə üzrə 19,2 milyon gecələmə qeydə alınıb. Bu isə pandemiyadan öncəki 2019-cu illə (20,1 milyon) müqayisədə cəmi 4,5 faiz azdır.
Qeyd edilib ki, turistlərin əksər hissəsi (təxminən 12 milyon gecələmə) təkcə iyun ayında Avstriyada dincəlməyə üstünlük veriblər. Bu göstərici ötən ildən 60,6 faiz çox və 2019-cu illə təxminən bərabər olub. Avstriyada dincələn turistlər arasında yerli əhali çoxluq təşkil edib.
Yarımillik yay mövsümünün ilk üçdəbir hissəsinə dair statistik göstəricilər Avstriyada turizm sektorunun qısa zamanda pandemiyanın yaratdığı böhrandan çıxa biləcəyini göstərir. Lakin pandemiya dövründə bu sektorda müəssisələrin uzun müddət bağlı qalması hazırda işçi çatışmazlığı ilə nəticələnib.
Qeyd edilib ki, payızda sosial tərəfdaşların zirvə toplantısında turizm sektorunda məşğulluq şəraitinin yaxşılaşdırılması, bu sahənin cəlbediciliyinin artırılması və gənc insanlar üçün uyğun təkliflərin təqdimi kimi məsələlər müzakirə edilməlidir.
