Auqsburqdakı məşhur sinaqoq yenidən qurulacaq.
Auqsburq sinaqoqu Almaniyanın yəhudi tarixinin görkəmli rəmzlərindən biridir. Bu həqiqət onunla bağlıdır ki, nasist terroru nəticəsində yəhudi məbədi demək olar ki, zərər çəkməyib. Sinaqoq 1917-ci ildə, Birinci Dünya Müharibəsinin şiddətli vaxtında tikilib. Lakin illər keçdikcə modern üslubunda tikilmiş bina xeyli köhnəlib.
Bu gün sinaqoq ibadət yeri olmaqla bərabər, həm də muzey və ictimai mərkəzdir. Auqsburq sinaqoqu Halderştrasda, Köniqsplas mərkəzi meydanı ilə Auqsburq dəmiryol vağzalı arasında yerləşir.
TELEJURNAL. az AZƏRTAC-a istinadən xəbər verir ki, yaxın günlərdə Auqsburq sinaqoqunun yenidən qurulması üzrə işlər başlanacaq. Təmirin dəyəri təqribən 23 milyon avro olacaq. Xərclərin yarısını federal hökumət ödəyəcək. Azad Bavariya dövləti təqribən 8 milyon avro, Auqsburq şəhəri isə yarım milyon avroya yaxın subsidiya verəcək. Qalan məbləği yəhudi icması ianələr hesabına toplamalıdır.
Təmir işlərinin rəsmən başlanması mərasimində Auqsburq-Şvabiya yəhiudi icmasının prezidenti Aleksandr Mazo çıxış edərək bu binanın tarixi barədə qısa məlumat verib. Onun sözlərinə görə, sinaqoq və muzey şəhərin ictimai həyatının mühüm elementləri, Auqsburqun şəhər peyzajının ayrılmaz tərkib hissəsidir.