ARDNF-də Ulu Öndərin 100 illik yubileyinə həsr olunmuş tədbir keçirilib
Azərbaycan Dövlət Neft Fondunda (ARDNF) Ümummilli Lider Heydər Əliyevin anadan olmasının 100-cü ildönümünə həsr olunmuş tədbirlər planı çərçivəsində növbəti görüş keçirilib və Ulu Öndərin əziz xatirəsi yad edilib.
Bu barədə “Telejurnal” məlumat verir ki,
Bildirilib ki, tədbir zamanı çıxış edən ARDNF-nin İcraçı direktoru İsrafil Məmmədov bugünkü müstəqil, qüdrətli və demokratik Azərbaycanın dahi lideri Heydər Əliyevin şah əsəri olduğunu qeyd edib və Azərbaycan xalqının müasir dövlətçilik tarixinin formalaşmasında və inkişafında Ulu Öndərin misilsiz rolu və xidmətləri barədə söz açıb.
İcraçı direktor bildirib ki, Ümummilli Lider Heydər Əliyev tərəfindən müəyyənləşdirilmiş strategiya ölkə iqtisadiyyatının inkişafına, mövcud resursların səmərəli istifadəsinə, dünya iqtisadiyyatına inteqrasiyaya və nəticə etibarilə vətəndaşların rifah halının yüksəldilməsinə xidmət edib.
İ. Məmmədov əlavə edib ki, neft və qazın satışından əldə edilən valyuta daxilolmalarının toplanması və səmərəli idarə edilməsi məqsədilə Prezident İlham Əliyevin təklifi ilə, 1999-cu ildə Ulu Öndər Heydər Əliyev tərəfindən əsası qoyulan Dövlət Neft Fondu bu milli inkişaf strategiyasını dəstəkləyərək xalqımızın bugünkü və gələcək nəsillərinə xidmət edəcək.
Tədbirə həmçinin, müstəqil Azərbaycanın ilk Baş naziri və sabiq xarici işlər naziri Həsən Həsənov qonaq qismində dəvət edilib. ARDNF-nin İcraçı direktorunun müşaviri Nərgiz Nəsrullayeva-Müdüroğlu ilə birgə müsahibə formatında baş tutan söhbətdə Həsən Həsənov Ulu Öndərin xidməti fəaliyyəti barədə çıxış edib, dahi şəxsiyyət haqqında öz fikir və xatirələrini bölüşüb.
Heydər Əliyevin Azərbaycan xalqı qarşısındakı misilsiz xidmətlərindən söz açan Həsən Həsənov Ümummilli Liderin xalqımızın milli kimliyinin və düşüncəsinin formalaşmasında əvəzsiz rolunu xüsusilə vurğulayıb.
