“Anatolian Phoenix – 2023”: Hərbçilərimiz şərti düşmən arxasında təxliyəni uğurla icra ediblər
Azərbaycan hərbçiləri “Anatolian Phoenix – 2023” təlimində şərti düşmən arxasında təxliyəni uğurla icra ediblər.
Bu barədə “Telejurnal” a Müdafiə Nazirliyindən məlumat verilib.
Bildirilib ki, qardaş Türkiyə Respublikasının Konya şəhərində keçirilən “Anatolian Phoenix – 2023” (Anadolu Ankası – 2023) beynəlxalq axtarış-xilasetmə təlimi davam edir.
Plana uyğun olaraq, beynəlxalq təlimin növbəti mərhələsində paraşüt hazırlığı və patrul fəaliyyəti üzrə müxtəlif tapşırıqlar yerinə yetirilib.
Ssenariyə əsasən, qəzaya uğramış ekipaj üzvlərinin şərti düşmən arxasında axtarış-xilas və təxliyə edilməsi üzrə növbəti fəaliyyəti təlim iştirakçıları tərəfindən uğurla icra olunub.
Tapşırıqların yerinə yetirilməsində əsas diqqət şəxsi heyətin paraşütlərdən istifadə bacarıqlarının təkmilləşdirilməsinə, həmçinin onların döyüş və xüsusi hazırlıq səviyyəsinin daha da artırılmasına yönəldilib.
Qeyd edək ki, beynəlxalq təlimdə ölkəmizi Azərbaycan Hərbi Hava Qüvvələrinin pilotları, texniki heyəti və aviasiya vasitələri ilə yanaşı, Azərbaycan Hərbi Dəniz Qüvvələrinin və Xüsusi Təyinatlı Qüvvələrin hərbi qulluqçuları təmsil edir.
