“Anadoludan Qarabağa” Türkiyə-Azərbaycan Media Forumunun iştirakçıları QHT Agentliyində olublar
Bakı, 17 iyun, TELEJURNAL AZƏRTAC-a istinadən xəbər verir ki,
Bakıda keçirilən “Anadoludan Qarabağa” Türkiyə-Azərbaycan Media Forumunun iştirakçıları Qeyri-Hökumət Təşkilatlarına Dövlət Dəstəyi Agentliyində (QHT) olublar.
Agentlikdən bildiriblər ki, giriş nitqi ilə çıxış edən qurumun icraçı direktoru Aygün Əliyeva Agentliyin fəaliyyəti və gələcək hədəfləri barədə qonaqlara məlumat verib. A.Əliyeva qeyd edib ki, bu gün dünyaya nümunə olan Azərbaycan-Türkiyə dostluq və qardaşlığı bütün istiqamətlərdəki əməkdaşlıqda özünü göstərir. Uğurlu əməkdaşlığa imza atan Azərbaycan və Türkiyənin mətbuat sahəsində də birgə fəaliyyəti önəmli rol oynayır. İki qardaş ölkənin öndə gələn media qurumları arasında əlaqələrin inkişafı ölkələrimizdə baş verən proseslərə daha operativ reaksiya vermək, cəmiyyətimizi dolğun məlumatlandırmaq baxımından da əhəmiyyətlidir. Digər tərəfdən beynəlxalq və ikitərəfli münasibətlərdə medianın rolu olduqca vacibdir, çünki media ictimai rəyə birbaşa təsir edən, onu formalaşdıran və istiqamətləndirən rola sahibdir.