Aİ Rusiyaya qarşı sanksiyaların uzadılmasını təsdiqləyib
Avropa İttifaqı (Aİ) Xerson vilayətinin qubernatorunun vəfat etmiş müavini Kirill Stremousovu siyahıdan çıxararaq, Rusiya əleyhinə sanksiyalar siyahısının növbəti altı ay uzadılması ilə bağlı qərarını qüvvəyə mindirib.
TELEJURNAL xəbər verir ki, bu barədə Aİ Şurasının müvafiq qərarı çərşənbə axşamı İttifaqın rəsmi jurnalında dərc olunub.
“Ukraynanın ərazi bütövlüyünü, suverenliyini və müstəqilliyini pozan və təhdid etməkdə davam edən hərəkətləri nəzərə alaraq, Rusiyanın fiziki və hüquqi şəxslərinə qarşı sanksiyalar haqqında qərarı daha altı ay müddətinə uzadılmalıdır”, – sənəddə deyilir.
Stremousovdan başqa, Dövlət Dumasının vəfat etmiş deputatı Nikolay Petrun və “Komsomolskaya Pravda”nın rəhbəri Nikolay Sunqork də qara siyahıdan çıxarılıb.
Bundan əvvəl Aİ Donetsk və Luqansk “Xalq Respublikaları”nın, eləcə də Xerson və Zaporojye vilayətlərinin statusunun 2022-ci ildə dəyişdirilməsi ilə əlaqədar Rusiya Federasiyasına qarşı sanksiyaların müddətini 24 fevral 2024-cü ilə qədər uzadıb.
Avropa İttifaqı 2014-cü ilin martında Rusiya üçün qara siyahı yaratmağa başlayıb və onu hər altı aydan bir altı ay müddətinə uzadıb. Bu siyahıda olan bütün şəxslərin ittifaq ərazisinə daxil olması qadağandır, onların Aİ-dəki maliyyə aktivləri dondurulur və Avropa bizneslərinə onlarla hər hansı əlaqə saxlamaq qadağandır.