Iraqın xüsusi xidmət orqanları ilə özünümüdafiə dəstəsinin birlikdə keçirdikləri əməliyyat nəticəsində İŞİD terror qruplaşmasının bir sıra üzvləri həbs edilib.
“TELEJURNAL” AZƏRTACA istinadən xəbər verir ki, bu barədə özünümüdafiə dəstəsinin komandiri Qasım Mösləh məlumat verib. O bildirib ki, xüsusi xidmət orqanları ilə birlikdə İraqın Əl-Anbar vilayətində keçirilən əməliyyat nəticəsində gizlənən terrorçular və onlara məxsus silah-sursat anbarları aşkar edilib.
Qeyd edək ki, İraqda törədilən bir sıra terrorlardan sonra Prezident Mustafa Kazemi xüsusi xidmət orqanlarına terrorçuların ölkə ərazisindəki fəaliyyətinə son qoymaq barədə qəti tapşırıq qoymuşdu.
Qasım Mösləh bildirib ki, Əl-Anbar vilayətində keçirilən əməliyyat terrora qarşı mübarizənin birinci mərhələsidir. Onun sözlərinə görə, ölkənin digər vilayətlərində də xüsusi əməliyyatlar keçiriləcək.
Nəzərə çatdıraq ki, 2017-ci ildə İŞİD qruplaşmasının İraq ordusu tərəfindən məhv edilməsinə baxmayaraq, bəzi üzvləri bir araya gələrək ölkənin müxtəlif vilayətlərində terrorçuluqla məşğul olmağa davam edirlər.